Runavík: Inntøkur og skattaprosent óbroytt

Býráðið í Runavíkar kommuna hevur samtykt fíggjaætlanina fyri 2015. 

Inntøkurnar fyri 2015 eru mettar at verða tær somu sum í ár tær verða 131,5 milliónir krónur. Og skattaprosentið verður óbroytt, 22 prosent. 

Raksturin økist harafturímóti við góðum trimum milliónum, upp í góðar 91 milliónir krónur næsta ár, tí lønirnar hækka, og nýggj tilboð eru á skránni, skrivar kommunan á heimasíðu síni. 

Barnafrádrátturin verður óbroyttur, 5.000 krónur fyri hvørt barnið, men kommunan ætlar at lækka barnaansingargjøldini við umleið fimm  prosentum næsta ár. Og ætlanin er lækka barnaansingargjøldini enn meira næstu árini.

23,5 mió. til íløgur

23,5 milliónir skulu nýtast til íløgur næsta ár, og eru tað serliga tvær stórar verkætlanir, sum eru á skránni fyri 2015. 

Tær eru av vatnverkið  á Skála, sum skal framtíðartryggja vestara og eystara arm á Skálafjørðinum við vatni, og framhald av spillivatnsverkætlanini. Í 2015 stendur Skála fyri tørni, skrivar kommunan. 

Býráðið boðar eisini frá ætlanum í 2016 og 2017. Í 2016 ætlar býráðið at gera Náttúrubarnagarðurin Sóljuhjarta í Søldarfirði lidnan og at binda Kongshavn og Betabryggjuna saman í Runavíkar havn. 

Í 2017 skal havnin í Runavíkar gerast liðug, spillivatnsætlanin heldur fram, og so ætlar kommunan at fara undir at fyrireika arbeiðið at gera eina svimjihøll.