Sonja Klein verður dómpróstur

Næstu tríggjar mánaðirnar fer Sonja Klein at røkja starvið sum dómpróstur, tí Uni Næs fer í farloyvi.

Tað skrivar heimasíðan hjá fólkakirkjuni. 

Sonja Klein hevur verið sóknarprestur við Havnar kirkju - Dómkirkjuna - síðani 1994. 

Uni kannar átrúnað

Uni Næs fer í hesum tíðarskeiði at gera annað arbeiðið. 

Hann hevur sett sær fyri at kanna, hvønn leiklut átrúnaður hevur í almenna rúminum, og hvussu átrúnaðurin ávirkar samfelagið, og hvussu samfelagið ávirkar átrúnaðin. 

Tað er fyrstu ferð í føroyskari kirkjusøgu, at ein kvinna er partur av leiðsluni í fólkakirkjuni.

- Óneyðugt er at minna á, at fólkakirkjan eyðvitað tekur undir við javnstøðu, og at kvinnur hava sjálvsagdan rætt at virka í føroysku fólkakirkjuni, sigur Jógvan Fríðriksson, biskupur á heimasíðuni hjá Fólkakirkjuni.