- Tíðindi, mentan og ítróttur
Skiparin á Anitu: Eftirlitið góðkendi veiðidagbók
![](https://kvf.fo/sites/default/files/styles/grein-ovasta-mynd/public/brimil_og_anita.jpg?itok=30rKaKWG)
Skiparin á Anitu játtar seg sekan í ákæruni um at hava ført skeiva veiðidagbók. Men hann verjir seg við, at eftirlitsmyndugleikin kortini hevur góðkent dagbókina.
Tað byggir skiparin á, at Tjaldrið hjá Vørn gjørdi eftirlit umborð á Anitu 3. juni í fjør, og tá varð veiðidagbókin góðkend.
Skiparin á Brimli, sum í rættinum greiddi frá málinum um gørnini hjá Anitu, segði í síni frágreiðing, at tað bar ikki til at síggja út frá dagbókini í juni, hvar gørnini hjá Anitu stóðu, og tí átti Tjaldrið heldur ikki at havt góðkent dagbókina tá.
Ítøkiliga er skiparin á Anitu ákærdur fyri at hava brotið kunngerð nr 105 frá 5. august 2013 um skipan av fiskiskapinum eftir havtasku og svartkalva við gørnum á føroysku landleiðini.
Gørnini stóðu aðrastaðni
Tá fólk frá Brimli fóru út við Anitu eftir deyðsvanlukkuna í februar, komu tey eftir, at gørnini vóru ikki sett har, sum tey skuldu sambært veiðidagbókini.
Skiparin á Anitu vardi seg í rættinum við, at hann hevði ført veiðidagbók, sum hann altíð hevði gjørt, og at Tjaldrið hevði gjørt eftirlit umborð 3. juni 2013 og góðkent veiðudagbókina.
- Vit standa tí í teirri støðu, at hóast skiparin játtar seg sekan, so er hansara verja, at myndugleikarnir, also Vørn, hava góðkent viðurskiftini, segði hann.
Stjórin á Vørn, Elmar Højgaard, sigur við útvarpið, at hann hevur onga viðmerking, fyrr enn hann hevur kannað málið nærri.