Ferðavinnan: Umsetningurin meiri enn hálv mia. kr.

Umsetningurin í ferðavinnuni í fjør var 577 milliónir kr., og tað er met, vísa tøl frá Hagstovuni. Tað eru umleið fýra prosent av bruttotjóðarútøkuni. Í 2011 var umsetningurin 448 milliónir ella 3,4 prosent av BTÚ..

Hagstovan hevur kannað búskaparligu árinini av útlendsku ferðafólkunum, sum koma til landið, hvat tey keypa av vørum og tænastum.

Guðrið Højgaard, stjóri í Visit Faroe Islands, sigur, at gongdin í ár hevur verið betri enn í fjør, og tí bendir alt á, at ferðavinnan longu í ár hevur rokkið málinum fyri 2015, sum var at fáa 600 milliónir kr. í umsetningi.

Guðrið Højgaard sigur, at vøkstur verður aftur næsta ár, og tí bendir alt á, at ferðavinnan fer at røkka visjónini fyri 2020 um at tvífalda ferðavinnuna.