Kyndil vil ikki til Vágs mitt í viku

Í Kyndli eru tey ónøgd við, at besta kvinnuliðið hjá felagnum skal til Vágs at spæla seinnu hálvfinaluna í steypakappingini mitt í viku.

Dysturin skal avgreiðast mikukvøldið, 28.01, klokkan 20, men Andreas F. Hansen, venjari hjá Kyndli, heldur ikki, at kappingarnevndin hjá hondbóltssambandinum hevur tikið atlit til trupulleikarnar, sum standast av hesum.

Hann sigur, at tað er trupult hjá leikarunum, sum hava arbeiði og børn, at ferðast til og liggja nátt í Suðuroy mitt í viku. Afturat hesum heldur hann, at Kyndil er fyri mismuni, tí mansliðið hjá Kyndli eisini skal spæla hálvfinalu í steypakappingini mikukvøldið, og at kvinnurnar tískil neyvan fáa nógvar kyndlafjepparar til Vágs at stuðla.

Kappingarnevndin nýtist ikki at ganga øllum ynskjum á møti

Inga Dahl, forkvinna í kappingarnevndini hjá hondbóltssambandinum, sigur í stuttari viðmerking, at bólkaspælið og hálvfinalurnar skulu spælast innan fyri eitt stutt tíðarskeið.

Hóast eitt hoyringarskriv verður sent út, eftir at dystirnir eru lagdir, so nýtist tað ikki at merkja, at kappingarnevndin skal ganga øllum ynskjunum um dystarskránna á møti.