70 ár síðan Auschwitz

Í dag eru 70 ár síðan, at seinastu fólkini vórðu leyslatin frá týningarleguni, Auschwitz, í Póllandi. Dagurin, tá ið Holocaust fekk ein enda, verður bæði mintur aftur á við gleði og sorgblídni.

Fleiri enn 7.650 fólk líktust livandi beinagrindum orsakað av føðslutroti, tá tey henda kalda januardag í 1945 vórðu leyslatin.

Undir seinna heimsbardaga vórðu 6 milliónir jødar týndir, umframt at fólk úr øðrum minnilutabólkum eisini vórðu týndir. Í Auschwitz týningarleguni vórðu umleið ein millión fangar týndir.

Dagurin í dag er blivin sera viðkomandi og hevur elvt til kjak eftir seinastu álopini á jødiskar synagogur, jødiskar skúlar og á jødiska handilsmiðstøð í París herfyri.

Minningarhald

Í samband við almenna minningardagin um Holocaust, skipar Vinafelagið Føroyar – Ísrael fyri minningarløtu í Østrøm kl. 19.30. Til hesa løtuna kemur Shmulik Fried úr Ísrael at greiða frá felagsskapinum, Keren Hayesod, sum síðan 1920 hevur hjálpt jødum heim til Ísraels og hjálpt teimum til rættis í heimlandinum. 

Les meira um minningarløtuna hjá Vinafelagnum Føroyar - Ísrael á shalom.fo.