Skulu hava summarfrí um summarið

Fólk, sum arbeiða í flogførum, eiga, eins og aðrir løntakarar, at kunna hava summarfrí um summarið.

Vinnumálaráðið vil hava løgtingið at broyta lógina um frítíð við løn, so tey, sum arbeiða í flogførum, fáa rætt til at hava summarfrí millum 2.mai og 30.september frá 2016 at rokna. 

Vinnumálaráðið sigur, at uppskotið hevur ongar fíggjarligar avleiðingar fyri vinnuna. 

Men uppskotið kann fáa avleiðingar fyri Atlantic Airways, tí felagið møguliga skal finna fleiri frítíðaravloysarar um summarið. 

Ymisk rættindi

Vinnumálaráðið vísir á, at sambært donsku frítíðarlógini kunnu flogskiparar og flogternur halda summarfrí um summarið. 

Tað ger, at tey, sum arbeiða í flogførunum hjá Atlantic Airways, hava ymisk rættindi.

Tey, sum búgva og hava arbeiðsstøð í Danmark, hava rætt til frítíð eftir donsku frítíðarlógini og kunnu tí halda summarfrí um summarið. 

Tey, sum arbeiða á sjónum, eru ikki við í uppskotinum hjá Vinnumálaráðnum. Tey vera framvegis undantikin regluni um rætt til at hava summarfrí um summarið.