Tannrøktarar sleppa eisini at útskriva heilivág

Tannrøktarar fáa nú eisini hava heimild at útskriva reseptheilivág.

Sum er hava tannrøktarar í Føroyum ikki hesa heimild, men noyðast at biðja ein tannlækna at útkriva heilivágin fyri seg.

Karsten Hansen, landsstýrismaður, hevur biðið løgtingið um heimild til í kunngerð at loyva tannrøktarum at útskriva reseptheilivág.

Trivnaðarnevndin hevur viðgjørt uppskotið, og ein samd nevnd tekur undir við uppskotinum.

Tannrøktarar hava útbúgving og góðkenning at kanna tenninar á fólki og at gera smærri viðgerðir. Tannrøktarar kunnu starvast á tannlæknastovu, men vanligt er eisini, at teir arbeiða sjálvstøðugt.

Tað hevur leingi verið eitt ynski hjá tannrøktarum í Føroyum at fáa sama rætt at útflýggja reseptheilivág sum starvsfelagarnir í Danmark, og tá Heilsuskipanin var til hoyringar gav landsstýrismaðurin lyfti um, at hann fór at arbeiða fyri at broyta lógina.