Vit skulu hava egið Fíggjarligt váðaráð

Føroyar eiga at hava sítt egna Fíggjarliga váðaráð.

Millum tey 24 uppskotini, sum andstøðuflokkarnir fara at leggja fram fríggjadagin, er eitt hjá Tjóðveldi um Fíggjarligt váðaráð.

Kristina Háfoss, løgtingskvinna, sigur, at neyðugt er at fremja ítøkilig átøk at forða fyri fíggjarkreppum í framtíðini.

Fíggjarkreppan lærdi flestu lond, at nóg mikið er ikki at hava fíggjareftirlit, sum hevur eftirlit við hvørjum fíggjarstovni.

Neyðugt er eisini at hava yvirskipað fíggjarligt eftirlit, sum støðugt heldur eyga við fíggjarligu váðunum í samfelagnum og fíggjargeiranum sum heild, sigur Kristina Háfoss í Tjóðveldi, sum vil hava løgtingið at fáa landsstýrið at stovna Fíggjarligt váðaráð.