Oljufýringar, hitapumpur og elbilar í tingið

Millum annað hesar spurningar vil Jóhan Dahl, landsstýrismaður í vinnumálum, hava løgtingið at taka støðu til.

Fyrrapartin legði hann frágreiðing fyri løgtingið um elorku-økið. Frágreiðingin skal vera grundarlag undir aðalorðaskifti um elorku í næstu viku.

Skjóta umlegging til grøna orku

Jóhan Dahl sigur í frágreiðingini, at mest týðandi kjakið snýr seg um, hvørt politiska skipanin er sinnað at gera politisk átøk fyri at fáa skjóta umlegging til grøna orku í Føroyum.

Hann vil eisini hava kjak um, hvønn leiklut SEV skal hava á el-marknaðinum, og hvønn bygnað SEV skal hava. Og haraftrat vil Jóhan Dahl eisini hava politikarar at taka støðu til, hvussu tú tryggjar innovatión og veruliga kapping á føroyska el-marknaðinum.

Aðalorðaskiftið um elorku verður á tingfundinum mánadagin klokkan 13.30