Mist tolið við ítróttarhøllini í Sandoynni

Fíggjarnevndin hjá løgtinginum hevur mist tolið við ítróttarhøllini í Sandoynni.  

Í uppskotinum um eykajáttanarlóg, sum er í tinginum, biður Mentamálaráðið um 600.000 kr. til at fáa ljóðviðurskiftini og onnur minni brek rættað í ítróttarhøllini í Traðardali, so høllin endaliga verður avhendað Sandoyar skúlasambandi.

Men hetta dámar Fíggjarnevndini lítið. Hon vísir á, at upprunaliga ætlanin við verklagslógini um høllina var, at heimild varð fingin til at byggja eina ítróttarhøll í Sandoynni.

Síðani skuldi Sandoyar skúlasamband yvirtaka høllina. Kortini tykist tað sum byggjaríið heldur fram aftaná at alt tað var bygt, sum heimilað var í verklagslógini. 

Fíggjarnevndin mælir tó til at játta tær 600.000 krónurnar, men so verður lokið lagt á kassan. 

Treytin hjá Fíggjarnevndini er, at Sandoyar skúlasamband tekur við ábyrgdini av høllini soleiðis sum grundarlagið var undir verklagslógini.