Føðideildin í Suðuroy: Fundur broytti einki

Føðideildin á Suðuroyar Sjúkrahúsi letur aftur 1. januar sum ætlað.

Støðan er óbroytt eftir fundin í dag millum allar borgarstjórarnar í Suðuroynni og Karsten Hansen, landsstýrismann í heilsumálum.

Tað er leiðslan á Suðuroyar Sjúkrahúsi, sum í skrivi hevur heitt á landsstýrismannin um at lata føðideildina aftur.

Óheppin avgerð

Hetta er ein óheppin avgerð, heldur Kristin Michelsen, borgarstjóri á Tvøroyri. 

Borgarstjórarnir í Suðuroynni hava avtalað nýggjan fund í vikuni at viðgera støðuna, og kravið er framvegis tað sama: At føðideild  verður á Suðuroyar Sjúkrahúsi eftir 1. januar næsta ár. 

Karsten Hansen, landsstýrismaður í heilsumálum, sigur, at støðan er óbroytt eftir fundin í dag, og hann heldur fast um avgerðina at lata føðideildina aftur. 

Sett arbeiðsbólk

Karsten Hansen hevur sett ein arbeiðsbólk at greina støðuna. Arbeiðsbólkurin skal koma við einum tilmæli til landsstýrismannin um hálvan juni. 

Í arbeiðsbólkinum eru umboð fyri Suðuroyar Sjúkrahús og Landssjúkrahúsið.