Diplomatisk sambond týdning fyri búskapin

Tað er týdningarmikil liður í búskaparligu menningini í Føroyum at knýta beinleiðis diplomatisk sambond við lond, ið hava týdning fyri føroyskan búskap.

Tað sigur Kaj Leo Holm Johannesen, løgmaður. 

- Føroyar hava í nógv ár arbeitt við at betra okkara handilsviðurskifti við Russland.  Nýggja sendistovan er týdningarmikið amboð hjá okkum at styrkja handilsviðurskiftini við Russland og onnur eystanlond, sigur hann.

Í gjár var móttøka, í sambandi við at nýggja sendistovan Føroya í Moskva er latin upp. 

Til móttøkuna vóru løgmaður, sendimaður Føroya í Russlandi og umboð fyri almennu myndugleikarnar í Føroyum. Eisini vóru einar 20 føroyskar fyritøkur við. 

Umboð fyri politisku myndugleikarnar í Russlandi, útlendsk sendifólk í Moskva, og russiskir samstarvsfelagir hjá føroysku fyritøkunum vóru eisini til móttøkuna, sigur Løgmansskrivstovan.