Avstralia sendir bátaflóttafólk til Kambodja

Tríggir iranar og ein persónur úr Myanmar, sum hava søkt um friðskjól í Avstralia, komu í dag til høvuðsstaðin í Kambodja, Phnom Penh.

Hesi eru fyrstu fólkini, sum koma til Kambodja, eftir at stjórnin í fjør gjørdi politiska avtalu við Avstralia, sum merkir, at bátaflóttafólk, sum fáa friðskjól í Avstralia, skulu sendast til Kambodja at búgva.

ST ónøgt við politikkin

Avstralia rindar fátæka landinum umleið 200 miljónir krónur um árið fyri at veita flóttafólkum varðandi uppihaldsloyvi. 

ST hevur hvassliga funnist at avstralska flóttafólkapolitikkinum.

Men konservativa stjórnin í Canberra tvíheldur um skipanina, sum hevur víst seg at rigga væl til at halda flóttafólkum burtur frá avstalsku strondini.

Varðhaldsmiðstøðir

Flóttafólkini eru heldur ikki væl komin til Avstralia, meðan umsóknin um friðskjól verður viðgjørd. Landið hevur gjørt avtalu við Papua Ný Guinea og oyggjastatin, Naura, um at skipa fyri og reka varðhaldsmiðstøðirnar, áðrenn flóttafólkini fáa noktað friðskjól ella verða send til Kambodja.

Teir fýra persónarnir, sum komu til Kambodja, eru fyrstir av 1.200 flóttafólkum, sum halda til í varðhaldsmiðstøðum.

Í stríð við samtyktir

Fleiri leiðarar í Evropa, teirra millum danski forsætisráðharrin, Helle Thorning-Schmidt, hevur víst avstalsku skipani frá sær, tí hon stríðir móti altjóða samtyktum.

Amnesty International finst eisini hvassliga at skipanini, skrivar AFP.