Søkti ikki men varð biðin um at verða stjóri

Nýggi stjórin í Atlantsflogi var ikki funnin millum mongu umsøkjararnar, sum vóru til starvið. 

Stjórin á Faroe Ship, Johanna á Bergi, varð headhuntað, tí hon hevði júst tað, sum nevndin helt, at Atlantsflogi tørvar.

Starvið sum stjóri í Atlantsflogi varð sett fyrr í vikuni, og 45 umsóknir vóru annars til starvið, sum Niels Mortensen, nevndarformaður tá segði vóru frá mongum góðum umsøkjarum.

Ikki millum umsøkjarar

Men stjórin, sum var settur, var kortini ikki at finna í stóra umsøkjaradunganum, tí nevndin í flogfelagnum fór sjálv eftir Johonnu á Bergi, sum tók av tilboðnum.

Niels Mortensen, nevndarformaður, vil hvørki vátta ella avsanna søguna, men sigur tó, at nógv fleiri fólk enn teir 45 umsøkjararnir hava "verið gjøgnum maskinaríið", sum hann tekur til. 

Jóhanna á Bergi tekur við stjórastarvinum í Atlantsflogi í seinasta lagi 1. september.

Hon vil hvørki vátta ella avsanna tíðindini um, at hon er headhuntað, men sigur, at hon gleðir seg til starvið.