Óvist hvat vit kundu fingið burtur úr Eurovision

Vinnumálaráðið hevur spurt íslendsku ferðavinnuna, um hon hevur nakra meting um, hvussu stórt marknaðarvirði íslendska luttøkan í Eurovision hevur fyri Ísland.

Stutta svarið var, at tey ongantíð hava gjørt slíkar útrokningar, og at tey heldur ikki hava hoyrt um onnur lond, sum hava gjørt tað. Tað sigur Johan Dahl, landsstýrismaður í vinnumálum, í svari til Janus Rein, løgtingsmann.

SÍ EISINI Føroyar sleppa ikki við til Eurovision

Landsstýrismaðurin sigur, at tað er nærum ómøguligt at siga, hvussu stóra beinleiðis ávirkan marknaðarføringin í sambandi við Eurovision hevði havt á føroyska ferðavinnu og tónleik.

Bara sjálvstøðug lond sleppa at vera við í Eurovision Song Contest, - tí, sum fyrr var Melody Grand Prix, og tí sleppa Føroyar ikki at vera við har.

Bjørn Kalsø, landsstýrismaður, hevur eisini svarað Janusi Rein, løgtingsmanni, sum spurdi, um Føroyar kunnu vera við í stóru árligu evropeisku tónleikakappingini.

Treytirnar kundu verðið broyttar

Landsstýrismaðurin svarar, at Mentamálaráðið og Kringvarpið kannaðu fyri nøkrum árum síðani, um Føroyar kunnu vera við.

Kringvarpið spurdi í 2010 um virknan limaskap í evropeiska public-service felagsskapinum European Broadcasting Union - EBU. Slíkur limaskapur krevst fyri at vera við í Eurovision Song Contest. Svarið var, at bara sjálvstøðug lond kunnu fáa limaskap.

Bjørn Kalsø heldur tó, at til ber at sleppa av við hesa treytina, um nóg stór orka verður løgd í tað, møguliga saman við londum, sum stuðla Føroyum. Men tá krevst, at Kringvarpið av nýggjum søkir um virknan limaskap í EBU, sigur Bjørn Kalsø, landsstýrismaður.