Sambandið og Javnaðarflokkurin varðveita sessirnar

Enn ein veljarakanning vísir, at Sambandsflokkurin og Javnaðarflokkurin varðveita fólkatingsessirnar.

Tríggjar kanningar eru gjørdar upp undir fólkatingsvalið hesaferð, og tær vísa allar, at Sambandsflokkurin og Javnaðarflokkurin endurvinna sessirnar.

Kanningin, sum Fynd hevur gjørt fyri Miðlahúsið og Kringvarpið, vísir, at Sambandsflokkurin fær 26,5 prosent av atkvøðunum, og Javnaðarflokkurin fær 22,4 prosent.

Á triðja plássi er Tjóðveldi við 20,7 prosentum.

Óvissa

Av tí at óvissan í kanningini er 2-3 prosent hvønn vegin, kann spenningur verða serliga millum Javnaðarflokkin og Tjóðveldi.

Fólkaflokkurin fær sambært kanningini 16,1 prosent, Miðflokkurin 6 prosent, Framsókn 3,7 prosent, Sjálvstýrisflokkurin 2,5 prosent, og Uttanflokkalistin hjá Zakariasi Wang fær 1,9 prosent. 

Veljarakanningin varð gjørd í gjárkvøldið, og 793 svaraðu.

Av teimum spurdu, søgdu góð 13 prosent seg ikki hava tikið støðu til, hvønn flokk tey fara at velja. 

7,3 prosent svaraðu, at tey ætla sær ikki á val.