Kostar 2.000 kr. at vera á bíðilista

Tey 240 fólkini, sum bíða eftir bátaplássi í Tórshavnar kommunu, skulu nú gjalda 2.000 kr. fyri at vera á bíðilistanum.

Tað hevur býráðið samtykt.

Endamálið er, sambært býráðnum, at stytta bíðilistan og bíðitíðina.

Fáa pengarnar aftur

Fólk fáa tær 2.000 kr. aftur, tá tey fáa pláss til bátin, ella tá tey fara av bíðilistanum av øðrum orsøkum.

- Vit hava varhugan av, at nøkur teirra, sum eru á bíðilistanum, eru har, tí tað er ómakaleyst og ókeypis at vera á listanum.  Hetta ger, at bíðilistin neyvan vísir veruliga tørvin á bátaplásum. Tí hevur býráðið samtykt at taka 2.000 krónur fyri hvørja umsókn um bátapláss, sigur Sjúrður Olsen, formaður í Vinnunevndini í Tórshavnar býráðið.