Frágreiðingin um Eik kemur í august

Niðurstøðan hjá grein 19 nevndini hjá løgtinginum, sum kannar Eik Grunnin og eftirlitið við grunninum kemur ikki hesumegin summarfrítíðina.

Hon kemur í august, sigur formaðurin í nevndini, Joen Magnus Rasmussen, løgtingsmaður. 

Ætlanin var annars at hava frágreiðingina lidna nú í juni, men so kom fólkatingsvalið. 

Nevndin hevði fyrsta fundin 7.august í fjør.

Sambært lógini um grein 19 nevndina skal nevndin kanna viðurskifti í sambandi við virksemið hjá Eik grunninum frá 2002 til 2010, og eftirlitið við grunninum frá 2002 til mai í fjør.

Arbeiðssetningurin hjá nevndini fevnir tó ikki um revsirættarviðurskifti hjá einstaklingum. 

Umframt formannin, Joen Magnus Rasmussen, eru Kristina Háfoss og Helgi Abrahamsen í grein 19 nevndini.