Í dag skulu tingfólk veljast í nevndirnar

Nógv tingfólk fáa fleiri enn tann eina nevndarsessin, tí tingið hevur sjey fastar nevndir. Í øllum nevndum uttan Landsstýrismálanevndini eru sjey fólk og sjey tiltaksfólk.

Nevndarsessirnir verða býttir lutfalsliga millum samgongu og andstøðu, sum plaga at vera hvør sín valbólkur.

Longu nú, góðar tvær vikur eftir løgtingsvalið, eru tvey tingfólk uttanflokka, Annika Olsen og Sonja Jógvansdóttir.

Sannlíkt er, at tær fara í valbólk saman við samgonguni fyri at fáa nevndarsessir. Tingfundurin byrjar klokkan 10.