Syriza vann valið í Grikkalandi

Flokkurin á vinstravonginum, Syriza, vann tjóðartingsvalið í Grikkalandi í gjár. 

Syriza fær 35,47 prosent av atkvøðunum, og andstøðuflokkurin, Nýtt Demokrati, fær stuðul frá 28,09 prosentum. Størsti flokkur fær, eftir grikskum reglum, 50 sessir aftrat í tjóðartinginum, sum hevur tilsamans 300 sessir.

Men nú er boðskapurin hjá Syriza ein annar enn eftir valsigurin í januar.

Tá segði flokkurin, at samráðast skuldi av nýggjum um avtalurnar við altjóða kreditorarnar. Nú vil flokkurin seta í verk avtalurnar við kreditorarnar í ES, Altjóða gjaldoyragrunnin, IMF, og evropiska miðbankan, ECB.

Sita í fýra ár

- Hetta verður ein stjórn, sum fer at sita í fýra ár við stórum meiriluta, og sum fer at seta í verk nýskiparnir, sum lovað, sigur Olga Gero-vassili, talskvinna fyri Syriza.

- Vit fara at halda fram við samráðingunum við lánsveitararnar. Hetta er byrjanin upp á stríðið, sigur hon, og sipar til komandi tingingar um, hvussu nýskipanirnar skulu setast í verk.

Alexis Tsipras, formaður fyri Syriza, ávaraði í takkartalu síni í gjárkvøldið grikkar um, at stríðog strev er fyri framman, og ongar gandaloysnir eru. 

- Men vit fara at verja tey sosialt veiku, segði hann.