Eiga at seta spurning við Hoyvíkssáttmálan

Poul Michelsen, landsstýrismaður í vinnumálum, ætlar at kanna, um íslendingar duga betur at brúka Hoyvíkssáttmálan enn føroyingar.

Hann sigur í samrøðu við Vinnulívið, at er tað so, at íslendingar hava allar fyrimunir av hesum sáttmála, eiga vit at seta okkum spurningin, um vit yvirhøvur skulu hava hann. 

- Tað tænir okkum ikki, um tað er so, at tað bara eru vit, sum lata marknaðin upp fyri íslendingum. Hetta eiga vit at fáa staðfest. Er sáttmálin ikki gagnligur fyri okkum, mugu vit seta okkum spurningin, hví vit so skulu hava hann, sigur Poul Michelsen við Vinnulívið.

Mugu vera kappingarfør

Hinvegin heldur nýggi landsstýrismaðurin í vinnumálum, at vit mugu vera varin við at slaka upp á kappingarelementið. Tí tað má fyrst og fremst vera dugnaskapur, ið eyðkennir okkara vinnu- og handilslív.

Hann sigur við Vinnulivið, at  tað hevur avgerandi týdning, at føroyskar fyritøkur fyrst og fremst eru kappingarførar.