Heilsuverkið á einum vegamóti

Seinastu árini er starvsfólkatalið innan heilsuverkið minkað, men tørvurin á viðgerð og røkt er vaksin. 

Tað sigur Sirið Stenberg, landsstýriskvinna í heilsumálum, nú Johnny í Grótinum, stjóri á Landssjúkrahúsinum, hevur víst á, at virksemið á Landssjúkrahúsinum er økt umleið 20 prosent seinastu árini, men lønarjáttanin er tann sama sum í 2011.

Eitt yvirlit hjá Gjaldstovuni vísir, at í 2005 nýtti heilsuverkið 597 milliónir kr. Í fjør vórðu brúktar góðar 934 milliónir. Leysliga mett fáa tey trý sjúkrahúsini 200 milliónir kr. meira nú enn fyri tíggju árum síðani, men útreiðslurnar eru eisini hækkaðar.

Stórur tørvur er á serlæknum í sjúkrahúsverkinum. Serlæknafelagið vísti fyrr í ár á, at neyðugt er at seta 47 serlænar aftrat, skal føroyska heilsuverkið verða á sama stigi sum heilsuverkið í grannalondunum, m.a. tí at 14 serlæknar fara frá fyri aldur. 

Johnny í Grótinum, stjóri á Landssjúkrahúsinu, hevur víst á møguleikan at hava ein pulju til serlæknar aftrat vanligu játtanini til sjúkrahúsverkið.

Tað er eittt gott hugskot, heldur landsstýriskvinnan í heilsumálum, Siri Stenberg.

Siri Stenberg sigur, at í løtuni verður arbeitt við einari menningarætlan fyri heilsuverki, sum skal vera klár at taka støðu til 1. apríl 2016.