Avbjóðingin at fáa óstøðuga vindin til høldar

- Avbjóðingin hjá SEV í løtuni er fáa sum mest av óstøðuga vindinum til høldar, samstundis sum elveitingin er støðug. Tað skal m.a. gerast við nýggju battarískipanini í Húsahaga. 

Tað segði Hákun Djurhuus, stjóri á SEV, tá hann helt røðu á arktisku ráðstevnuni, The Arctic Circle, í Reykjavík í dag.

SEV-stjórin segði, at ein onnur avbjóðing er, at ov lítið av vatni og vindi er um summarið, og tí verður arbeitt við loysnum, sum kunnu goyma vindorkuna í longri tíð, t.d. við eini pumpuskipan og møguleikanum at gera vetni/brint úr vatni. 

Hann segði, at Føroyar hava ikki møguleika at binda í størri el-net og keypa orku haðani, sum t.d. Danmark, ið kann keypa el-orku úr Svøríki og Týsklandi. Tí noyðast Føroyar at hava sína egnu backup-skipan. 

Hákun Djurhuus greiddi frá grønu kósini hjá SEV, sum hevur til endamáls at gera Føroyar óheftar av olju í 2030, tá øll elorka á landi skal koma frá varandi orkukeldum, t.e. vindi, vatni, sjóvarfalli og sólorku.