Hjúnabandslógin kemur fyri tingið áðrenn jól

Nógv umrøða og kjak hevur verið um hjúnabandslógina seinastu árini, og tað gjørdist tískil eitt stórt evni til hetta løgtingsvalið. Tað eru tær fýra - Sonja Jógvansdóttir, uttanflokkakvinna, Bjørt Samuelsen úr Tjóðveldi, Kristianna Winther Poulsen úr Javnaðarflokkinum og Hanna Jensen úr Framsókn, ið leggja uppskotið fram fyri tingið.

Hóast uppskotið varð felt seinasta løgtingsval, er tað nógv, ið bendir á, at tað hesa ferð verður samtykt. Les eisini: Hjúnabandslógin bleiv ikki broytt

Bjørt Samuelsen sigur við in.fo, at uppskotið væntandi kemur fyri tingið í næstu viku, men í øllum førum áðrenn jól. Orsøkin til longu bíðitíðina er, at umsitingin hevur havt úr at gera við hetta mál. Á in.fo greiðir Bjørt frá, at talan er um, at tey einans ynskja at seta nakrar av donsku dagføringunum inn í føroysku hjúnabandslógina, men ikki allar.

Sum skilst fingu uppskotsstillararnir notatið frá umsitingini týsdagin og hava síðani tá umrøtt málið sínámillum og avgjørt at leggja tað fram fyri tingið, sum tað fyriliggur nú.

Kelda: In.fo