- Fyri neyðini at bankin verður endurstovnaður

Tað er harðliga fyri neyðini, at Landsbankin verður endurstovnaður. Í øllum førum sambært Kristinu Háfoss, landsstýriskvinnu í fíggjarmálum.

Fíggjarnevndin hjá Løgtinginum spurdi landsstýriskvinnuna, hvørjar uppgávur í fíggjarmálum ikki verða nóg væl røktar, síðani Landsbankin skal endurstovnast.

Landsbankin fær fimm uppgávur

Kristina Háfoss svarar við at nevna fimm uppgávur. Tær fimm uppgávurnar, sum sambært landsstýriskvinnuni ikki verða nóg væl røktar, eru: 

● óheft tjóðar-búskaparlig ráðgeving til land, løgting, vinnu, kommunur, fjølmiðlar og almenningin

● fíggjarligt váðaráð

● støðug frágreiðing um føroyska búskapin, um fíggjarligar váðar og fíggjargeiran

● kunning um búskaparstøðuna til útheimin

● samskipað umsiting av ogn og skuld

Figgjarøkið er í dag partvíst yvirtikið, tryggingarfeløg, pensjónsfeløg og realkredittfeløg eru undir føroyskari lóg og føroyskum eftirliti.

Fíggjarnevndin spurdi landsstýriskvinnuna, um ætlanin er at yvirtaka málsøkið peningastovnar. Um tað er eingin ætlan í løtuni, og tann yvirtøkan er heldur ikki nevnd í samgonguskjalinum, svarar Kristina Háfoss.