Hálv millión í jólagávu til sperdar familjur

Løgtingið hevur einmælt samtykt at játta Barnabata 500.000 krónur at lata fíggjarliga sperdum familjum ein styrk til jóla.

Tingfólk úr flestu flokkum løgdu uppskotið um eykajáttan fram.

Tey vístu á, at bæði samgonga og andstøða vilja hava eina serliga skipan fyri fíggjarliga sperdar barnafamiljur, so børnini ikki liva í fátækraváða, við teimum avmarkingum og avleiðingum, sum tað hevur hevur.

Nýggj skipan næsta ár

Eitt lógaruppskot um at hjálpa barnafamiljum er í løgtinginum til viðgerðar í løtuni. Men tann skipanin kemur ikki í gildi fyrr enn næsta ár. 

Tey, sum komu við uppskotinum um eykajáttan, siga, at á jólum, meira enn nakrantíð, merkja børnini í fíggjarliga sperdum familjum avleiðingarnar av at vera í fíggjarligari trongstøðu, og tí verður eykajáttanin latin Barnabata, sum veitir jólahjálp.

Øll 27, sum vóru í tingsalinum, atkvøddu fyri uppskotinum. Vikið varð frá øllum tíðarfreistum.