Flogferðaseðlarnir verða bíligari í 2016

Jóhanna á Bergi, stjóri í Atlantic Airways, sigur, at arbeitt verður við eini menning, soleiðis at flogferðaseðlarnir í 2016 gerast bíligari.

Tað er ikki bert í Føroyum, at prísurin lækkar. Ole Stouby, stjóri á Travelmarket, sigur, at flogferðaseðlarnir verða bíligari í Evropa næsta ár.

Ole Stouby vísir nevniliga á, at vit fara at síggja eina príslækking uppá 10 prosent á flogferðaseðlum í 2016, skrivar politiken.

2015 metgott hjá Atlantic Airways

Atlantsflog hevur havt eitt metár í ár við 30.000 fleiri ferðafólkum og einum vøkstri uppá 13 prosent samanborið við 2014.

Stjórin í Atlantsflogi, sigur, tað eru fleiri orsøkir til góða úrslitið í 2015. Millum annað eru fleiri føroyingar, sum arbeiða uttanlands, og føroyingar ferðast eisini meira.

Harumframt sæst eisini ein ferðafólkavøkstur, sum eru nakrar av orsøkunum til metgóða árið hjá Atlantic Airways.