Fólkavøksturin heldur fram

1. desember 2014 búðu 48.590 fólk í Føroyum. Eitt ár seinni, 1. desember 2015, búðu 49.138 fólk í Føroyum sambært Hagstovu Føroya.

Vøksturin í fólkatalinum hetta tíðarskeið var 548. Nettotilflytingin – munurin á til- og fráflyting – var 318 fólk sambært seinastu uppgerðini.

Fólkavøksturin steðgaður sunnanfjørðs

Hóast fólkavøkstur var í Føroyum frá 1. desember 2014 til 1. desember 2015, var hetta ikki galdandi fyri alt landið.

Í Sandoynni stóð fólkatalið so at siga í stað hetta tíðarskeið, men í Suðuroynni minkaði fólkatalið, upplýsir Hagstova Føroya á heimasíðuni.

Størsti vøksturin var í Tórshavnar, Runavíkar, Klaksvíkar, Sunda og Sørvágs kommunum. Lutfalsliga størsti vøksturin var í Sunda kommunu.