Úrslitið á kommunuvalinum hevði verið øðrvísi

Javnaðarflokkurin hevði fingið seks, ikki sjey, býráðslimir. 13 fólk eru í býráðnum. Í staðin fyri hevði Sambandsflokkurin fingið tveir býráðslimir og ikki ein.

Í yvirliti, sum Heilsu- og Innlendismálaráðið hevur kunngjørt, sæst, at fimm kommunustýri høvdu verið øðrvísi mannað í hesum valskeiðinum, um uppgerðarhátturin, sum landsstýrið nú ætlar at seta í gildi fyri kommunurnar, var komin longu í 2012, tá kommunuvalið var.

Í uppskotinum um nýggja kommunuvallóg, sum kemur í tingið í ár, verður mælt til, at uppgerðarhátturin verður tann sami sum í løgtingsvallógini.

SÍ EISINI Kommunuvallógin kanska broytt áðrenn valið

Hini fýra kommunustýrini, sum høvdu verið øðrvísi mannað um gjørt varð upp á sama hátt sum eftir løgtingsval, eru í Klaksvík, har Fólkaflokkurin hevði mist ein og Javnaðarflokkurin fingið ein afturat, og á Tvøroyri hevði Javnaðarflokkurin fingið ein afturat, sum listi K hevði mist.

Á Tvøroyri hevur listi C kortini longu meirilutan, fýra av sjey býráðslimum. Í Fuglafirði hevði listi B fingið ein frá lista D, og í Hvannasundi hevði listi A fingið allar fimm kommunustýrislimirnar, tí listi B hevði mist sín.

Landsstýrið ætlar, at broytingin skal vera komin í gildi fyri kommunuvalið 8. november í ár. Á heimasíðuni hjá heilsu- og innlendismálaráðnum, himr.fo, er frágreiðing um uppgerðarháttin við størsta brøki. Har er lógaruppskotið eisini, og hoyringarfreistin er til 4. mars.