Prestar verða tvingaðir at signa samkynd

Ósemjan snýr seg um, hvørt bispur sjálvur sleppur at gera av, um fólkakirkjan skal signa samkynd ella ikki.

Katrin Kallsberg, forkvinna í nevndini, vil vera við, at bispur sjálvur skal taka stig til at seta eina nevnd at gera eitt uppskot um ritual.

Ritualið - um samkynd skulu signast í kirkju - skal síðani góðkennast í Mentamálaráðnum.

Jógvan á Lakjuni er varalimur í trivnaðarnevndini, men hevur umboðað Fólkaflokkin í nevndini í málinum um hjúnabandslógina.

Hann er ósamdur við Katrina Kallsberg um, hvussu lógin skal tulkast.

Jógvan á Lakjuni vil vera við, at prestar verða tvingaðir at signa samkynd í kirkjuni.

Eisini Sambandsflokkurin heldur, at samkynd verða lóggivin inn um kirkjugátt, og flokkurin fer tí ikki at atkvøða fyri hjúnabandslógini, sum støðan er, sigur Bárður Nielsen, formaður í Sambandsflokkinum.