Arbeiðið at yvirtaka familjurætt byrjað

Fyrsti formligi samráðingarfundurin millum føroysk og donsk embætisfólk um at yvirtaka familjurætt var fríggjadagin.

Á fundinum varð avtala at lýsa, hvussu familjurættarliga økið er skipað, og fyritreytirnar fyri at yvirtaka málsøkið. Næsti samráðingarfundur verður í Keypmannahavn fyrst í mai mánaði.

Heilsu-og innlendismálaráðið sigur, at miðað verður eftir at leggja uppskot um at yvirtaka málsøkið fyri tingið í næstu tingsetu, og at familjurættarliga økið kemur á føroyska hendur á ólavsøku í 2018.