"Svartideyði" vann Wacken Metal Battle Føroyar

Bólkurin Svartideyði vann tónleikakappingina Wacken Metal Battle Føroyar, sum var í Perluni gjárkvøldið. 

Bólkar, sum spæla harðan tungmálsmtónleik, kappaðust.

Vinnandi bólkurin spælir Blackend Doom Metal, sigur Teitur Egholm Fossaberg. 

Anonymir tónleikarar

Hann er tann einasti, sum úttalar seg, tí limirnir í bólkinum spæla ikki bara tungmálm. Teir spæla eisini leiklutin.

Limirnir í bólkinum tosa ikki við fjølmiðlar, og teir vilja heldur ikki hava síni borgarligu nøvn fram, bara pallnøvnini, Kríggj, Pest, Hungur og Deyði. 

Góð undirtøka

Til samans 11 bólkar kappaðust. Bólkarnir fingu millum 20 og 25 minuttir á palli hvør, meðan ein dómsnevnd metti um avrikini, og hvør bólkur skuldi umboða Føroyar á tí stóra tungmálmsfestivalinum Wacken í Týsklandi seinni í ár.

Svartideyði hevur vunnið møguleikan at spæla í finaluni í Wacken í Týsklandi 4. til 6. august í ár.