Bernie Sanders hevur vunnið tríggjar statir

Í USA hevur demokratiska valevnið Bernie Sanders vunnið trý undanval á Hillary Clinton í statinum Washington, í Alaska og á Hawaii. 

Hildið verður, at Bernie Sanders fekk meira enn 70 prosent av atkvøðunum í øllum trimum statunum.

Men tað verður møtimikið hjá Bernie Sanders at fáa Hillary Clinton aftur, tí hon er nógv nærri at røkka teimum 2.383 atkvøðunum, ið skulu til fyri at gerast demokratiskt forsetavalevni.

Fólkaríkir statir skulu vinnast

Áðrenn hesi trý undanvalini í statinum Washington, í Alaska og á Hawaii hevði Hillary Clinton 1692 umboð aftan fyri seg, meðan Bernie Sanders hevði 949, ið fara at vísa á hann sum valevni.

Hóast Bernie Sanders er bjartskygdur, so skulu størri og meira avgerandi statir vinnast, um hann skal gerast demokratiskt forsetavalevni. Tað eru statir sum California og New York har veljarakanningar vísa, at Hillary Clinton fer at vinna á Bernie Sanders.