BankNordik selur partabrøvini í Vørði

BankNordik og Arion banki gjørdu treytaða avtalu í oktober í fjør um 51 prosent av partabrøvunum í fyrsta umfari. Næsta ár, í 2017, skuldi Arion keypa hini 49 prosentini.

Men íslendski tjóðbankin bað teir báðar bankarnar broyta avtaluna soleiðis, at øll partabrøvini verða seld í einum, og tey verða avroknað í íslendskum krónum, ikki í evrum. 

Bankarnir tóku áheitanina til eftirtektar, skrivar BankNordik í fráboðan til keypsskálarnar í morgun.

Vinningur og vinningsbýti

BankNordik væntar framvegis at fáa 60 mió. kr. í vinningi av partabrævasøluni umframt part av inntøkunum hjá Vørður-samtakinum í fjør. 

BankNordik miðar eftir at fremja søluna í fyrra hálvári í ár, men treytin er góðkenning hjá íslendsku myndugleikunum. 

Og tey, sum eiga BankNordik, kunnu vænta sær 100 milliónir krónur í eyka vinningsbýti í 2017.