Krígsveteranar í Føroyum fáa betri tilboð

Veteran-miðstøðin í Ringsted, sum er undir danska verjumálaráðnum, arbeiðir við at bøta um tilboðini til veteranar, sum eru búsitandi í Føroyum.

Samstundis verður kannað, hvussu umstøðurnar hjá føroyskum veteranum eru, og arbeitt verður við at seta ítøkilig tiltøk í verk beinan vegin.

Tað skal m.a. gerast við samskipaðum arbeiði í Føroyum millum veteran-miðstøðina og viðkomandi myndugleikar í Føroyum. 

Tað upplýsir skrivstovan hjá Tjóðveldi á Christiansborg í tíðindaskrivi.

Báðir fólkatingsmenninir hava spurt

Bæði Magni Arge og Sjúrður Skaale, fólkatingsmenn, hava reist málið um støðuna hjá krígsveteranum, sum hava verið í danskari hertænastu, og eru búsitandi í Føroyum, hjá danska verjumálaráðharranum.

Ein ritgerð hjá Georg L. Petersen vísir, at veteranar úr Føroyum, sum hava búsett seg í Danmark eftir lokna hertænastu, eru komnir betur fyri seg enn teir, sum búgva í Føroyum. 

Illgruni hevur verið um, at orsøkin til hetta er, at tilboðini hjá danska herinum ikki altíð hava rokkið so væl til Føroya, og tað hevur verið torført at finna veteranarnar, sum búgva í Føroyum.