Tænastumenn fáa ikki rentustuðul til egin hús

Prestar og onnur, sum hava fingið álagt at búgva í øðrum húsum enn sínum egnu, hava ikki rætt til at fáa rentustuðul av lánum í húsunum, sum tey eiga.

Annita á Fríðriksmørk í Tjóðveldi hevur sett Kristinu Háfoss, landsstýriskvinnu, spurning um málið.

Lógin um rentuútreiðslur av lánum ásetur, at tann, sum fær rentustuðul, hevur lán og býr í sethúsunum. 

Men summi sleppa ikki at búgva í egnum húsum, hóast tey óbeinleiðis eru noydd at hava síni egnu hús. 

Prestar og læknar

Talan er m.a. um prestar, læknar og aðrar tænastumenn, sum sambært lóg skulu búgva í tænastumannaíbúðum, sum hoyra til embætið, men sum tænastumenninir ikki eiga.

Teir skulu rinda leigu fyri íbúðina, men hava ikki rætt til rentustuðul til sínu egnu hús, tí teir búgva ikki í teimum, sigur Annita á Fríðriksmørk.

Prestar og onnur, sum hava fingið álagt at búgva í øðrum húsum enn sínum egnu, hava tí nógv tyngri lánsbyrðu av sínum sethúsum enn onnur. Húsaprísurin er stýrdur av marknaðinum, og rentustuðulin er við í prísásetingini.

Tí eru hesir tænastumenn við skerdan lut. Teir noyðast at kappast um húsakeyp, uttan at hava rætt til rentustuðul, við fólk, hava rætt til stuðulin, sigur Annita á Fríðriksmørk í viðmerkingunum til fyrispurningin.