Landið vil hava Landsbankan sum fíggjarstovn

Arbeiðsgevarafelagnum hóvar ikki, at landsstýrið ætlar, at endurstovnaði Landsbankin eisini skal vera fíggingarstovnur hjá landi, kommunum og almennum grunnum. Hetta fer at skeiklað kappingina millum tað privata og almenna, heldur arbeiðsgevarafelagið.

Í hoyringarsvarinum til uppskotið um at endurstovna Landsbankan, sigur arbeiðsgevarafelagið, stórur vandi er fyri, at kappingin millum alment og privat kann vera skeiklað, tá landið í veruleikanum nýtir sínar ognir og peningastreym sum trygd fyri at fáa eina betri rentu til eina kommunu ella ein grunn. Um rentan varð ásett út frá einari kredittmeting av einari ávísari kommunu ella grunni, átti rentan kanska í veruleikanum at verið hægri, sigur arbeiðsgevarafelagið.

Arbeiðsgevarafelagið heldur eisini, at spurningur kann setast við óheftni hjá Landsbankanum, tá sami stovnur, sum skal gera váðagreiningar av fíggjarsektorinum samstundis er ein av stóru aktørunum á marknaðinum, sum kappast við privatu fíggjarstovnarnar.

Føroya Arbeiðsgevarafelag mælir tí frá, at landsbankin kann virka sum fíggarstovnur hjá kommunum og grunnum.