Makrelfiskiskapurin í Grønlandi byrjaður

Makrelfiskiskapurin hjá grønlendingum er byrjaður. Eitt skip hjá Arctic Prime Fisheries hevði í gjár fiskað hálvt annað hundrað tons av makreli við Eysturgrønland, skrivar grønlendska kringvarpið, KNR.

Kvotan er 85.000 tons í ár. Grønlendsk skip eiga 35.000 tons, útlendsk skip, sum grønlendsk feløg við egnum skipum leiga, eiga 20.000 tons, og feløg, sum ikki eiga skip, fáa 30.000 tons.

Higartil eru 13 makrelloyvi skrivað, sum 20 skip kunnu brúka í summar.