Neyðugt at taða lendið

Koyring við ATV-arum, lendisakførum ella bóndasúkklum, sum tey eisini verða kallað, og øðrum akførum við vegin niðan á Sornfelli gjørdi, at Umhvørvisstovan gav loyvi til at taða í 570 metra hædd.

Tveir festarar søktu um undantaksloyvi at taða oman fyri 250 metrar fyri at bjarga lendinum, sum akfør skemma.

Í undantaksloyvunum, sum festararnir fingu í apríl, sæst, at endamálið við taðingini er, sambært umsóknunum, ein roynd at fáa meira gróður og forða fyri, at skaðin versnar.

Náttúrugripasavnið mælti frá

Umsóknin varð send til ummælis hjá Náttúrugripasavninum, Búnaðarstovuni og Tórshavnar kommunu. Náttúrugripasavnið mælti frá og mælti í staðin til at seta forboð fyri at koyra í haganum.

Náttúrugripasavnið sigur, at taðingin skaðar nátúrligu plantusamansetingina í haganum. Búnaðarstovan tekur undir við skynsamari taðing fyri at fáa gróður aftur í lendið og forða fyri erosjón.

Men Búnaðarstovan leggur tó nógvar treytir við fyri at avmarka ávirkanina á náttúruna. Tær treytirnar hevur Umhvørvisstovan so tikið við í loyvunum.

SÍ EISINI Fýra undantaksloyvi latin

Heilsu- og umhvørvisdeildin hjá Tórshavnar kommunu gevur sítt viðmæli við teirri treyt, at taðað verður sum fyriskrivað í kunngerðini um taðing. Í loyvunum stendur annars, at økið fram við vegnum niðan á Sornfelli er i longri tíð taðað við flottøðum.

Søkt varð um undantaksloyvi í fimm ár, men loyvini, sum eru latin, eru galdandi til 31. august 2018. Eftir tann dag verða loyvini eftirmett.