Landsstýrið biður tingið um seks aðalorðaskifti

Landsstýrið ætlar at fáa seks aðalorðaskifti í løgtinginum, nú nýggj tingseta byrjar í dag.

Í januar 2014 samtykti løgtingið at heita á landsstýrið um at fyrireika og leggja frágreiðing fyri løgtingið um politikk fyri skapandi vinnur. 

Politikkurin er nú orðaður og verður lagdur fyri løgtingið til aðalorðaskiftis í heyst. 

Raðfestu átøkini verða nærri greinað til fíggjarlógina fyri 2017.

Rúsevni og avleiðingar

Løgtingið fær eisini eina frágreiðing frá landsstýrinum um rúsdrekka- og rúsevnispolitikk. Aðalorðaskifti verður um hana.

Endamálið er at fyribyrgja og tálma, og menna og víðka viðgerðartilboðini til misnýtarar og avvarðandi teirra og minka medisinsku og sosialu skaðaárinini av misnýtslu. 

Ætlanin er at fáa sett í verk ítøkilig átøk, sum skulu fremjast árini 2016-2020.

Harafturat verða aðalorðaskifti um menningarætlanina fyri sjúkrahúsverkið, um javnstøðupolitikkin næstu árini, um eigarapolitikk, tað er politikkur um landsins lut í millum annað partafeløgum, og ognir landskassans, sum ikki eru í fíggjarlógini, og landsstýrið fer eisini at biðja um aðalorðaskifti um tilbúgving.