Skriðulop á Sundi

Seinnapartin leyp ein skriða, har vegurin gongur oman til Sundsverkið, men hon tarnaði ikki ferðsluni, verður sagt á Landsverki.

Eyrur og evja rann í rennuna, sum gongur fram við vegnum, og hon varð skjótt tipt. Landsverk ruddaði upp í tríggjar lastbilar, og rennan er nú opin aftur.

Um 11 tíðina fyrrapartin rullaði ein steinur oman á vegin sunnan fyri Tjørnuvík. Hann var umleið eitt hálvt tons til støddar, og varð ruddaður burtur.

Bilførarar eiga at vera ansnir

Mads Andrias Hansen, sum hevur vakttelefonina hjá Landsverki, sigur, at tað kann vera vandi fyri skriðulopi eisini aðrastaðni í landinum, nú blot er komið í, eftir at tað hevur verið so turt alt summar.

Hann heitir á bilførarar um at ansa væl eftir og hava eyguni við sær.