- Tíðindi, mentan og ítróttur
Stendur við avgerðina
![](https://kvf.fo/sites/default/files/styles/grein-ovasta-mynd/public/20161108_drama_i_suduroy._0076.jpg?itok=bO8OFrXV)
Borgaralistin á Tvøroyri gjørdi av undan valinum at fara eftir borgarstjórasessinum á Tvøroyri, tað sigur Anita Vibergsdóttir, komandi býráðslimur á Tvøroyri í tíðindaskrivi.
"Eftir triðja uppstillingarfund, gjørdu vit valevnini á Borgaralistanum skrivliga avtalu um, at vunnu vit valið, skuldi fyrstvaldi á listanum fara eftir borgarstjórastarvinum."
SÍ EISINI Video: Anita krevur borgarstjórasessin á Tvøroyri
"Harafturat avtalaðu vit, eisini skrivliga, at um vit vunnu valið, so skuldi eingin okkara hoppa yvirum og atkvøða fyri, at nakar á øðrum lista bleiv borgarstjóri," skrivar Anita Vibergsdóttir.
Hon hevði møguleika at gerast borgarstjóri, tá hon kom í lyklastøðu eftir valið, men valdi at peika á Kristin Michelsen av Kommunulistanum. Í tíðindaskrivnum sigur Anita Vibergsdóttir:
"Valið bleiv tíverri ein lemjandi ósigur fyri Borgaralistan, og kom eg í ta støðu at vera einasta valevni á okkara lista, sum kom inn í býráðið. Beint eftir, at valið var av, var eg inni á valstaðnum."
SÍ EISINI Krevur ikki longur borgarstjórasessin
"Eg bleiv beinanvegin boðin til samráðingar av størsta listanum, Kommunulistanum, og tók eg av. Eg fekk tó eisini boð frá Javnaðarlistanum um, at eg var vælkomin at tosa við tey.
"Men út á náttina hevði eg telvað meg til eitt úrslit við Kommunulistan, sum eg var sera væl nøgd við, og sum eg kann standa inn fyri."
"So til teirra, sum undrast á, at eg ikki fór undir realitetssamráðingar við Javnaðarlistan, kann eg siga, at hetta fyri mítt viðkomandi ongantíð gjørdist aktuelt, tí at samráðingarnar við Kommunulistan gingu so væl, sum tær gjørdu."
Avgerðin verður ikki broytt
Anita Vibergsdóttir ætlar at halda fast um avtaluna við Kommunulistan, ger hon eisini greitt í tíðindaskrivinum:
"Hóast afturvendandi áheitanir frá Javnaðarflokkinum, valdi eg at halda meg til avtaluna við Kommunulistan og henda avgerð verður ikki broytt."
SÍ EISINI Fundur avlýstur: Býráðið kundi ikki skipast
"Dagin eftir valið høvdu valevnini á Borgaralistanum fund. Har greiddi eg frá, hví eg hevði tikið ta avgerð, sum eg tók. Tað var mín sannføring, at við hesi avgerð fóru vit at fáa mest og best burturúr komandi setu."
"Vit vóru øll seks valevnini á fundi, og meirilutin tók mína avgerð til eftirtektar, skrivar Anita Vibergsdóttir í tíðindaskrivinum."
Anita Vibergsdóttir vil ikki gera aðrar viðmerkingar til málið, enn tað, ið hon longu hevur skrivað í tíðindaskrivinum.