Leggja Novo undir at hava snýtt íleggjarar

Amerikanskir íleggjarar kenna seg snýttar av donsku heilivágsfyritøkuni Novo Nordisk, og draga nú fyritøkuna í rættin.

Sambært stevningini vilja íleggjararnir vera við, at fyritøkan hevur ikki upplýst íleggjarar um stóru trupulleikarnar, hon hevði at dragast við, serliga á amerikanska marknaðinum síðstu tvey árini. 

Tað var ikki fyrr enn í fjørsummar, at íleggjarar komu eftir, at Novo Nordisk ikki longur er tað gulleggið, fyritøkan hevur verið.

Marknaðarvirðið minkað 315 mia. kr.

Síðani er virðið á partabrævinum fallið 40 prosent, og marknaðarvirðið á Novo Nordisk er minkað 315 milliardir krónur.

Íleggjarar vilja vera við, at kunningin um støðuna hjá Novo Nordisk hevur ikki verið nøktandi í 12 til 18 mánaðir.

Til august í fjør helt fyritøkan fast um sínar góðu vónir fyri 2016. Tá Novo Nordisk síðst í august fór at draga í land, reyk botnurin undan partabrævinum, ið beinan vegin fall 20 prosent, og síðani er fallið 20 prosent afturat.

Insulin undir trýsti

Novo Nordisk hevur seinni vart seg við, at prísurin á insulini á amerikanska marknaðinum hevur verið undir sera stórum trýsti, og tað er orsøkin til vánaligu gongdina hjá fyritøkuni.

Í síðstu viku stevndi ein amerikanskur eftirlønargrunnur, sum eisini eigur partabrøv í Novo Nordisk, donsku fyritøkuna. Nú koma so privatir, amerikanskir íleggjarar við eini stevning afturat.