Fíggjarmálaráðið vrakar Henrik Weihe Joensen

Fíggjarmálaráðið vrakaði Henrik Weihe Joensen, kommunustjóra á Tvøroyri, sum nevndarlim í Landsbankanum.

Tað er niðurstøðan hjá Føroya Kommunufelag eftir fund við Fíggjarmálaráðið í dag.

12. desember gjørdi Kommunufelagið av at tilnevna Henrik Weihe Joensen, kommunustjóra á Tvøroyri, sum lim í nevndina fyri Landsbankan og Tummas Eliasen, kommunustjóra í Klaksvík, sum varalim.

Fíggjarmálaráðið segði seg góðtaka umboðini.

Seinni er vent í holuni, og Kommunufelagið fekk boð frá Fíggjarmálaráðnum um, at samansetingin í nevndini fyri Landsbankan var ikki nóg góð, og Fíggjarmálaráðið boðaði frá, at Henrik Weihe Joensen ikki kundi umboða felagið í nevndini.

Fíggjarmálaráðið sigur seg heldur vilja hava ein búskaparfrøðing, enn ein løgfrøðing í nevndina.

Margháttligt

Eyðun Christiansen, stjóri í Kommunufelagnum, sigur tað vera margháttligt, at Fíggjarmálaráðið fyrst góðkendi tilnevningina hjá felagnum, fyri síðani at kúvenda og vraka tilnevningina.

Kommunufelagið fer at hava stýrisfund fríggjadagin, og tá fer stýrið at tilnevna ein annan lim í nevndina fyri Landsbankan. Og tað verður helst Tummas Eliasen, sum varð tilnevndur varalimur.

Og so skal stýrið tilnevna ein annan varalim í nevndina fyri Landsbankan, sigur Eyðun Christiansen.

Hann vil ikki gera samrøðu við útvarpið um málið, men hann sigur, at støðan kennist løgin.

Sjey limir

Sambært lógini, um Landsbanka Føroya, so skulu sjey limir og sjey varalimir veljast í nevndina fyri Landsbankan. 

Landsstýriskvinnan velur tveir limir, og síðani skulu Fróðskaparsetrið, Arbeiðsgevarafelagið, fakfeløgini og Kommufelagið gera hvør sítt tilmælið um ein nevndarlim, sum landsstýriskvinnan so velur í nevndini fyri Landsbankan.

Sambært lógini um Landsbankan skulu limirnir í nevndini hava fakligar førleikar, sum búskaparfrøði, fígging og kredittmeting, og serligt innlit í føroyska fíggjargeiran ella búskapin í Føroyum. 

Vit hava roynt at fingið orðið á Kristinu Háfoss, landstýrismann í fíggjarmálum, og Bjarna Askham Bjarnason, aðalstjóra, um málið, men hvørgin tekur telefonina.