Høvuðsumvæla Eirargarð fyri 25 mió. kr.

Eirargarður 14 og 16 í Havn skulu høvuðsumvælast. 

Landsverk hevur boðið út heildarráðgevingina í sambandi við arbeiðið. Freistin at lata inn tilboð er til 10.februar. 

Landsstýriskvinnan í almannamálum fer at biðja løgtingið um 25,5 mió. kr. til at umvæla Eirargarð 14 og 16, sum eru bústovnar hjá fólki, sum bera brek.

Lógaruppskotið er tó ikki komið í løgtingið enn. Tað er enn til hoyringar. Hoyringarfreistin er til í morgin, 26.januar.

Bygdir í sjeytiárunum

Eirargarður 14 og 16 vórðu bygdir í sjeytiárunum og flutt varð í teir 1.apríl 1980. 

Bústaðirnir eru nú í so ringum standi, at fyri einum ári síðani vórðu tey, sum har búðu, flutt í bráðskundi, tí har vóru soppur og lekar.

Teknologisk Institut í Danmark gjørdi í mars í fjør soppakanningar í Eirargarði 14 og 16. 

Niðurstøðan tá var, at bygningarnir vóru í góðum standi, men at soppur er ymsastaðni, serliga í takrúminum. 

Vanligt slit og gamlar innleggingar og skipanir eru í báðum bygningunum, sigur Landsverk.

Dagføring

Høvuðsumvælingin umfatar dagføring eftir nútíðar krøvum, so umstøðurnar hjá teimum, sum har búgva og arbeiða, gerast betri. 

Sambært Almannamálaráðnum skal Eirargarður 14 umvælast fyrst.