Báðir tunlarnir verða goldnir í 2040

Tað verður ein stór avbjóðing at byggja Eysturoyartunnilin og Sandoyartunnilin, men kanningar av lendinum, sum borast skal ígjøgnum í Eysturoyartunlinum, vísa, at eingir stórvegis trupulleikar skuldu verið við arbeiðnum.

Tað sigur Teitur Samuelsen, stjóri í partafelagnum Eystur- og Sandoyartunlum.

Fyrsta skotið í Eysturoyartunlinum varð latið av í dag. Hann verður eftir ætlan liðugur at taka í nýtslu í 2020.

Læntar eru góðar 2,6 milliardir kr. til báðar tunlarnar.

Í 2023, tá Sandoyartunnlin væntandi er liðugur, verður farið at gjalda lánið aftur, og báðir tunlarnir skulu verða afturgoldnir í 2040.

Teitur Samuelsen var gestur í Degi og Viku í kvøld.