Viðgera játtanarkarmarnar í dag

Løgtingið fer í dag at viðgera uppskotið hjá Kristinu Háfoss, landsstýriskvinnu, um játtanarkarmarnar næstu fimm árini.

Tølini eru sera góð, segði landsstýriskvinnan, tá hon legði karmarnar fram fríggjadagin.

Landsstýrið væntar, at avlopið í 2018 verður 330 milliónir kr., og tað veksur upp í 455 milliónir kr. næstu árini.

Íløgurnar verður millum 330 og 470 milliónir krónur.

Raksturin veksur 1,5 prosent

Rakstrarútreiðslurnar næsta ár hækka hálvt annað prosent samanborið við í ár, men tá eru lønarhækkingar ikki íroknaðar.

Kristina Háfoss væntar, at inntøkurnar vaksa fimm prosent næsta ár.

Rakstrarúrslitið fyri 2016 verður væntandi 153 milliónir kr. 

Andstøðuflokkarnir eru tó ikki so jaligir. Teir finnast at millum annað raðfestingunum í kørmunum og búskaparpolitikkinum hjá landsstýrinum yvirhøvur. 

Tingfundurin í dag byrjar kl.10.00.