Eru farnir at umvæla Ran

Eru farnir at umvæla Ran
Trolarin, sum fekk ein sjógv á Flemish Cap, er komin á Havnina, har svartkalvin verður landaður
 
05.04.2017 - 11:45

Trolarin Ran kom á Havnina í gjár, eftir at skipið varð noytt at bróta túrin av, tí ein sjógvur breyt fimm rútar á brúnni, tá teir lógu bakk við Flemish Cap.

Skipið hevur sløk 200 tons av svartkalva í lastini, og túrurin var góður, sigur Hans Andrias Kelduberg, reiðari. Fiskurin verður landaður í dag, og hann er seldur, sigur reiðarin.

Seta nýggjar rútar í

Arbeiðið at seta nýggjar rútar í brúnna á Ran er longu byrjað, og nøkur tól skulu skiftast. Samstundis verður kannað, um el-skipanin hevur fingið skaða, og um neyðugt er at skifta fleiri tól, enn tey, sum hava fingið sjónligan skaða.

Arbeiðið verður mett at taka eina til tvær vikur, so fer Ran aftur til fiskiskap.

Tað var í lýsingini 27. mars at Ran fekk ein sjógv, meðan teir lógu bakk við Flemish Cap. Sjógvurin buglaði brúnna, og hann breyt eisini fimm rútar á brúnni. Fýra mans vóru á brúnni, tá sjógvurin breyt, og tveir av teimum fingu snuddir.

24 mans við

24 mans vóru við skipinum, sum fór til fiskiskap 23. februar.

Teir byrjaðu fiskiskapin á Atlantshavsrygginum, men har var lítið at fáa, og tí hildu teir leiðina fram yvir á Flemish Cap at fiska svartkalva.

Fiskiskapurin eftir svartkalva var góður, og Ran fekk sløk 200 tons, sum nú verða landað í Havn.
 

Er kopiera
Nýggjastu sendingar í ÚV
Mikudag 18. november
Skipsboð
216603
Mikudag 18. november
Heilsuhornið
216597
Týsdag 17. november
Vitan
216375
Týsdag 17. november
Vitan
216297
Nýggjastu sendingar í SV
Mikudag 18. november
Dagur og vika - teknmálstulkað
216592
Týsdag 17. november
Veðrið
216565
Týsdag 17. november
Dagur og vika við 3-2 - teknmálstulkað
216520
Mánadag 16. november
Veðrið
216486
Mánadag 16. november
Bygdarliv 4 – Eiði
216470