- Tíðindi, mentan og ítróttur
Bót til býráðslimir
Býráðslimir í Havn kunnu vænta, at at kommunala eftirlitið fer í lummarnar á teimum eftir pengum, um teir ikki akta boðini um at útflýggja skjøl í tveimum starvsfólkamálum.
Alalstjórin í Heilsu- og Innlendismálaráðnum, Turid Arge, sigur, at ráðið fyrireikar seg til at áleggja býráðslimunum bót.
Stríðið snýr seg um tvey starvsfólk á dagstovnaøkinum í kommununi, sum blivu uppsøgd. Kommunan vildi ikki geva starvsfólkunum kæruvegleiðing, tí hon metir ikki at har er nakar kærumyndugleiki viðvíkjandi starvsfólkamálum í kommununi.
Men Mentamálaráðið sigur, at ráðið er kærumyndugleiki, tí tað er ásett í dagstovnalógini. Ráðið hevur biðið kommununa um skjøl viðvíkjandi teimum báðum starvsfólkunum, men kommunan noktar at útflýggja tey.
Mentamálaráðið vendi sær so til Kommunala eftirlitið undir Heilsu og Innlendismálaráðnum, og eftirlitið gevur ráðnum rætt. Tórshavnar Kommuna skal útflýggja skjølini, annars fáa býráðslimirnir bót. Kommunala eftirlitið gav kommununi freist til 19. apríl at útflýggja skjølini, men ongi skjøl eru komin.
Og nú fáa býráðslimirnir bót. Men teir sum onkunsvegna kunnu prógva, at teir ikki taka undir við avgerðini hjá kommununi, kunnu sleppa undan.
Tað er við heimild í grein 55 stk 2, í kommunustýrislógini, at Heilsu- og Innlendismálaráðið nú fer at áleggja býráðslimum í Havn bót.
Greinin ásetur, at um kommunustýrið heldur seg óvirkið mótvegis lógar-ásettum skyldum, kann landsstýrismaðurin áleggja teimum kommunustýrislimum, sum bera ábyrgd av hesum, tvingsilsbøtur.
Tak niður